El mofu ya la sua memoria

Nestos días del solsticiu d’iviernu, cuando paez que’l sol descansa, cuando paez que’l sol fai una pousa antias de volver a la sienda inversa de faere crecere los días, alcuérdome de los rituales que celebrábamos de nenos. Nestos días del anu axuntábanse tantísimas fiestas ya rituales, que la memoria necesitaría una Navidá entera pa ser quien a faere l’alcordanza xeneral d’aquel.la riestra de cousas, las que la memoria guarda no corazón, como siempres al volver a los anos primeiros.

Una alcordanza humilde vien a mi si vuelvo a aquel.los días de fríu, xelu ya, muitas veces, nieve abonda. Esa pequena cousa yía’l mofu, lo qu’en castel.lanu chamaríamos ‘liquen’, probablemente. Probablemente, sí, porque los nomes que pon la xente nos pueblos tien difícil traducción a la categoría de la palabra culta ya tamién a la terminoloxía científica. El mofu naz nuna piedra húmeda, a la que la chuvia ya l’aire van convirtiendo en piedra fértil, porque del material inerte naz tamién el principiu verde de la vida. Porque la verdá yía que no mofu hai yá vida, primitiva seguramente, pero vida, onde palpita’l verdor ya’l cambiu, la mutación, la rueda del molín del tiempu que va fayendo la evolución de las cousas.

Tolos anos asperábamos a que chegara’l final del outuenu pa dir al monte o a las paredes de las afueras del pueblu p’arrincare’l mofu de las piedras, que quedaban esnudas mientrás nós l.levábamos aquel.la guapa sustancia a casa. Yera porque queríamos faere’l nacimientu, el nacimientu con un ríu de plata. Nun faltaban las figuras de la simboloxía más básica del nuesu imaxinariu: el padre, la madre, el nenu, la estrel.la bril.lando, como un sendeiru telúricu dende’l cielu a la esperanza. Tampoucu faltaban los personaxes que s’identificaban cona vida que víamos alredor de nós: el pastor, la ougüecha, la puente, el gochín, la mucher con un feix al l.lombu, el bidón de l.leite.Ya unos reis que diban asomando pol monte ya venían con cousas del outru mundu, d’un oriente ricu ya poderosu nel que s’arramaban l’ouru, l’inciensu ya la mirra. Unos reis de los qu’asperábamos los regalos, como recompensa a outru anu más onde asimilar la maldá, esa que siempres amenaza al mundu de la inocencia de los primeiros anos de la vida. Nun importaba muitu la calidá del regalu, lo que importaba yera’l regalu mesmu, porque’l regalu yía’l principiu de la vida social ya de la integración no complicáu xuegu de la convivencia humana.

Agora nun quitamos el mofu, porque sabemos que s’alcuentra mechor no sou sitiu qu’arrincándolu pa casa. Pero qué guapa yera, daquel.la, aquel.la ilusión de buscalu.