La palabra que vieno de Grecia ya chegóu hasta la punta de la braña

La hestoria de las palabras yía sorprendente ya cuerre por caminos ya sendeiros qu’enxamás imaxináramos. Nacen nun sitiu ya chegan a l.lugares inesperaos. Ya con el.las va’l pensamientu.

Na Grecia antigua había una humilde palabra, «aulé», que se refería al salón de casa ya tamién al sitiu onde se guardaban los animales domésticos, o seya, la corte, que nos nuesos val.les significa «cuadra».

Cuéntannos dalgunos estudiosos qu’esta palabra pasóu al l.latín como «aula», significando cousas asemechadas a l’antepasada griega: el cuartu, el salón palaciegu... Referíase esta palabrina tamién a la corte, onde taban guardaos los animales. Pero axuntóuse outru significáu más: el de tartera ou marmita. Pasanon los tiempos ya la gente común principióu a trasformare la palabra «aula» na palabra «olla», convirtiendo «au» en «o» ya duplicando la «l». Esta palabra popular pasóu al nuesu idioma romance ya, concretamente, la «l duplicada» convirtíuse na consonante chamada popularmente «che vaqueira» nos val.les donde s’alcuentra esta interesante pronunciación. La ol.la yía una cacerola más bien alta.

Una tierra de l.labor, propiedá de la mia familia, que daba muitu frutu ya taba nun chanín al l.lau de la vía del tren, chamábase La Ol.lina. Enxamás fui quien a esplicar el nome d’esta tierra, porque denguna razón me l.levaba a relacionar la tierra conas las ol.las. Pero la lóxica de la imaxinación dicíame que naquel.la tierra igual hubo una ol.la chena de monedas, como na comedia de Plauto.

Prestóume pol vivire qu’esta palabrina chegara a las brañas, onde había unas cousas que se chamaban «ol.leras», sitios onde se ponían las ol.las. Las ol.leras taban cerquina de las cabanas. Yeran construcciones onde los brañeiros metían los bidones con l.leite que muñeran antias. Yera pa que nun se cortara’l l.leite que diera la vaca.

La ciencia de la ol.lera yera que pasaba por el.la l’augua d’un manantial que salía de la fondura de las montañas ya taba cuasi xelada. Asina, aquel augua esfrecía’l l.leite pa que se conservara. La ol.lera yera un frigoríficu natural que nun necesitaba corriente nin enchufes a la l.luz. Pero había ol.leras que yeran entovía más sofisticadas ya que demostraban la sabiduría popular: yeran las ol.leras d’aire, qu’aproveitaban las corrientes d’aire qu’había nas piedras de, por exemplu, una l.lera o pedriza. L’aire fríu esfrecía’l l.leite guapamente. La intelixencia popular ya la naturaleza axuntábanse pa faere esta fantástica solución, tan ecolóxica como eficaz.

Ya esta yía la pequena hestoria d’una palabra humilde, que l.levaba tamién un trozu de pensamientu.