Pañar pa siguir xuntos

L a familia tien distintas estructuras según seya la zona cultural onde s’alcuentre ya según vaya pasando’l tiempu inevitable. Pero hai seguramente un principiu propiu de tolas familias de tolos tiempos: la busca de la xuntura, la tendencia a ser quien a afitar la unidá de los sous miembros. Ya, anque pa l.lograr la continuidá de la sociedá la familia espulsa a los fichos ya fichas pa que casen con xente d’outra sangre, nun hai dulda d’esto: búscase siempres que la familia siga xunida.

En mui bien de zonas nuesas la familia tuvo que partise, porque la xente nueva nun atopaba trabachu nin forma de vivire: Madrid, Barcelona ya outras muitas grandes urbes recibienon a la xente de los pueblos. D’esta traxedia vien l’iviernu demográficu de los nuesos val.les, onde viven los viechos alcordándose de los sous fichos. Consuélanse pensando naquel.los mozos que marcharan un día mientras la casa choraba. Porque la casa, o seya, la familia, sin la xente nueva, irá destinada a esbarrumbase, a quedar como un espectru de ventanas tapadas ya puertas pechadas.

La separación fai que naza’l dolor. Ya pa calmalu vuélvese, por exemplu, al pueblu, buscando que los nietos nun pierdan el raigañu, la cepa, l’orixe del que vienen el cuerpu ya la sangre. Pero con esto nun basta, porque la vida renaz nos barrios de la gran ciudá ya florez nos nuevos amigos urbanos. Faen falta, entós, refuerzos.

Cuando la familia yera una unidá de producción próspera ya tenía, por exemplu, animales domésticos, éstos podían valir pa la xuntura. Asina, mandábase a los fichos que vivían l.luenxe los productos del samartinu. Comiendo’l xamón o las morciel.las, amás d’alimentase, comulgábase aquel mundu de los padres viechos ya, seguramente, solos. Ya el.los, los padres ya los buelos, percibían que siguía vivu’l remu, el cordón umbilical que trayía ya l.levaba los sentimientos recíprocos.

Pero pue sere que yá nun queden padres. Pue sere que la casa física, esa caxa inerte, vaya, tamién, venciendo. Igual yá namás los árboles siguen fuertes ya dereitos, porque’l mundu vexetal soporta mechor el desaniciu del tiempu inevitable. Entós, al chegar l’outuenu, cuando la castañal de la casa dexa cayere los ouricios (esos niales del frutu prestosu), fai falta volver al pía del árbol centenariu. Volver pa recocher esi frutu, esas castañas conas que, yá na ciudá, seremos quien a sentinos outra vuelta xunto a los nuesos. Pañamos las castañas pa siguir xuntos, porque fayéndolas nuesas la estirpe continúa. Pañámoslas porque nun queremos renunciar a aquel.la l.lealtá primera. Por eso vamos a el.las, anque la nieve las anubra.