Ortiga ya pedagoxía

Esta tarde, yá cuasi de nueite, paséi por delantre la casa onde tanto xugara you de nenu ya de rapaz. Yera una casa de xente que vivía del ganáu, que yera poucu, ya de las tierras, que yeran unas malas ya outras mechores. Yera la casa d’una familia como muitas outras. Güei alcuéntrase esta vivienda parada no tiempu, petrificada pol silenciu. Porque agora na casa nun se siente nada ya namás la imaxinación yía quien a faeme escuitar na mia tiesta las voces d’outros tiempos. Voces d’al.legría ya de tristura, de riña ou de grandes risas, pero que siempres yeran síntomas de vida, cuando había xente abonda ya alcontrabas nenos a esgaya polos caminos.

Pero los viechos fonon morriendo ya marchanon pal outru outeiru del pueblu, onde duermen pa siempres. Los fichos tuvienon qu’afuxire pa sitios más ricos ou pal estranxeiru ya los nietos atopan una tierra que yá nun saben si yía la sua.

Hai agora un mar d’ortigas alredor de la casa abandonada. Siempres había dalguna ortiga. Alcuérdome de que precisamente delantre d’esta casa xuguemos muitos días, especialmente pol branu, mientras andábamos a las l.lagartas ou usábamos cualquier cousa como si fuera un balón de fútbol. Con pantalones cortos pasábamos horas ya horas, con pouca conciencia del tiempu. Chegaba la hora de comere ya nós ail.lí siguíamos, porque nun faíamos casu de los avisos que venían de las nuesas casas. Ya ail.lí nós xugando ya desobedeciendo, hasta que pola esquina apaecía la figura d’una madre ou d’una buela con una ortiga nas manos. Entós acabábase’l xuegu ya sabíamos que teníamos que marchar pa casa, onde taba puesta la comida. Porque si una cousa faía que tuviéramos pánicu yera que la buela, la madre ou la tía pasara una ortiga polas nuesas piernas.

La ortiga yera daquel.la, entós, un instrumentu fundamental del mundu de la pedagoxía. Igual que la vara d’ablanu reforzaba’l mandatu del profesor, la ortiga afitaba en nós la idea de que fai falta cumplir las normas de la casa, ou seya, las normas de la sociedá. Nun sei qué pensarán los mieus amigos pedagogos del usu de la ortiga. Pero you soi más bien escéuticu no tocante a las teorías pedagóxicas ya nesta cuestión sigo las cousas que dixera, irónica ya críticamente, Antonio Machado na sua obra “Juan de Mairena”, onde escribía que’l mechor pedagogu fuera Herodes. Ya tamién la ortiga pedagóxica fai que m’alcuerde del l.libru “Amor y pedagogía”, de Miguel de Unamuno, onde puei vese la ruina consecuencia que puei tenere’l fanatismu pedagóxicu. Dalguna cousa prestosa tenía la sabiduría popular de la educación, cuando había menos ortigas ya muitos más nenos

.