jueves. 08.12.2022
Venecia después del 'acqua alta'
Venecia después del 'acqua alta'

Venecia yera la patria de Marco Polo, que nacíu van 765 branos, no sieglu XIII. Antias de morrer na mesma ciudá fixo un gran viax por Asia Oriental, onde anduviera más de venti anos sirviendo al emperador Kublai Kan. No “L.libru de las maraviel.las del mundu” alcontramos las suas alcordanzas ya datos etnográficos muitu interesantes.

 

Cuantayá que tenemos relatos de pueblos distintos, como aquel.los que los griegos faían de los “bárbaros”. Lo que más chama l’atención de culturas diferentes de la nuesa yía la cuestión de los ritos de pasu: cómo naz la xente, cómo son las bodas, cómo se faen los rituales al morrer. Nun fai falta dir mui l.luenxe nel espaciu: na nuesa tierra cambianon muitu, por exemplu, los ritos de la boda, que yeran mui ricos ya variaos, dende la “pidida” a los “cantares de boda”. Outramiente, aquel.la boda yera más una xuntura de familias que d’individuos.

 

Nun capítulu sobre los tártaros cuéntanos Marco Polo un ritual de casamientu estraordinariu: hai bodas de novios que yá tán muertos. Si unos padres tienen la desgracia de que muerre un fichu xoven, buscan una novia tamién muerta d’outra familia. Si los padres arreglaban la boda de los fichos vivos, yía normal que tamién axeitaran la boda de los fichos muertos. Los padres de la novia muerta tienen que dare una dote curiosa. Faise un contratu de matrimoniu entre las familias, intercámbianse regalos a esgaya ya hai una ceremonia de la que se faen pinturas. Depués quéimase tou: contratu, muebles, pinturas ya’l fumu que xube del l.lume hasta’l cielu val pa l.levar a los novios muertos las cousas que faen falta pa ser home ya mucher felices na vida superior.

 

Dalguién dirá que yeran mui atrasaos esos tártaros casando novios muertos, pero you pienso que yeran xente mui humana ya civilizada, porque son los símbolos los que nos estreman de los animales. Si un animal, por un instante namás, pudiera pensar, riríase tamién d’esta costume tártara.

 

Gracias a esta boda los padres alcontrarán un poucu de consuelu. Yía verdá que la boda de los muertos yía absurda en cuantas que nun val pa la reproducción. Pero fai falta tener en cuenta que los grandes rituales de nacencia, matrimoniu ya muerte tenían, ya tienen, outra meta importante: texer la solidaridá social, axuntar los grupos familiares, fitar lo que nos xune. Gracias a la boda de los novios muertos las dúas familias tán menos solas, son agora amigas, regálanse cousas ya ayúdanse si fai falta. Hai en nós un impulsu fuerte, inconsciente que nos emburria a la solidaridá ya a la xuntura. You quiero, you adoro esta potencia: valnos pa derrotar la división.

Los novios muertos
Comentarios