Outubre

Agora que tamos yá n’outubre alcordámonos de los viechos reflanes, que dalguna verdá tenían, anque un poucu contradictoria. Ya yía contradictoria la verdá del reflaneiru porque alcontramos sentencias pa una cousa ya pa la contraria.

Sicasí, paez que tien razón aquel reflán nuesu que diz “Por outubre nun molesta’l l.lume”. Ya, anque tamién hai outros reflanes que dicen que cuidáu cono sol d’outubre, qu’entovía puede calentanos la cabeza más de la cuenta, la verdá yía que la friura yá asoma por un sitiu ya por outru.

Emtama, entós, la nuesa mirada a dir en busca de la cabana, cona sua canción de l.lume ya fumu. En busca tamién del calor de la cocina onde’l filandón esparde’l mantu de la memoria que nos axunta. Tamién la mirada del outuenu va al significáu fondu de las l.leendas, al mundu de los cuentos populares. Nuna palabra, por outubre entamamos a afuxir del monte ya del árbol, onde sopla yá un aire fríu, pa dir al aveiru, al refuxu del mundu de la palabra.

Ya no mundu de la palabra yía onde nos alcontramos na nuesa auténtica casa, humana ya prestosa. Yía cuando nos alcordamos de la raposa, del osu, del l.lobu. Pero non de los organismos reales ya físicos, sinón d’esas imáxenes, más guapas, que la nuesa cultura dexóu impresas na nuesa mente, na nuesa forma de ver la vida. Diciéndolo d’una manera más direutua, en nós.

Tenemos que nos preparar, entós, pa sentir cómo la pita esquiva a la raposa ya cómo l’home derrota al l.lobu.