sPINOSA

Mañana cúmplense 382 anos del nacimientu, na ciudá d’Ámsterdam, de Baruch Spinoza. Unu de los pensadores más intelixentes de tolos tiempos, exemplu de vida dedicada a entender la realidá: esi yera Spinoza.

Descendiente de xudíos que marcharan de la península ibérica pa Holanda, el fríu ya la humedá d’un día d’outuenu de 1632 recibienon a esti home al que la tuberculosis l.levóu a la muerte cuando tenía namás 44 anos d’edá.

Borges dedicóu-l.ly a Spinoza un versu memorable: “Alguien construye a Dios en la penumbra”. Asina fuera, efeutivamente, la trayeutoria inteleutual d’esti autor, cona mente chena d’honradez ya agudeza. Xeométricamente foi construyendo la imaxe del mundu, que yera la imaxe de Dios.

Un panteísmu racional: tous somos ya vivimos nuna rueda inmensa, somos parte d’el.la ya movémonos nel.la como un rudenu infinitu. Somos una parte de Dios, ou seya, de la natura. Ya esta rueda inmensa, que muel implacablemente al pasu del tiempu, yía quien a vese a sí mesma gracias a la razón humana.

El molín del progresu de la humanidá muel mechor na penumbra, l.luenxe de los salones rel.lucientes de la riqueza.

Sí. Spinoza yera un xeniu humilde: renuncióu a una plaza na Universidá ya dedicóuse a pulir lentes, al trabachu de la óptica, pa entendese a sí mesmu ya al infinitu.