lady godiva

Nun conocemos cuándo foi, si pola primavera ou pol outuenu, si faía fríu ou si faía calor, pero sí sabemos que yía una l.lienda de la que nun somos quien a olvidanos.

A mi paezme, reconozo que sin tener dengún argumentu razonable, que fuera al final del branu, pol mes de setiembre cuando Coventry víu pasar esnuda a la mucher del que mandaba na ciudá.

No sieglu XI la xente de Coventry, vil.la puesta no mediu d’Inglaterra, taba afogada polos impuestos que’l gobernante obligaba a pagar. Diz, entós, una versión de la l.lienda que la mucher d’esti gobernante paseóu a cabal.lu esnuda por tola ciudá pa protestar pola inxustica. Sicasí, la versión mayoritaria d’esta hestoria popular diz que, como la xente protestaba ya Lady Godiva daba la razón al pueblu, Leofric, el gobernante, díxo-l.ly a la sua mucher que si tantu quería a aquel.la xente, que montara esnuda no cabal.lu ya cruzara’l centru de la ciudá.

Lady Godiva aceutó la condición del sou home ya cruzóu Coventry esnuda, pero la xente zarróu las ventanas ya nun la amiróu, por respetu a el.la. Namás un habitante de la ciudá s’atrevíu a mirar por un ventanu pa ver a la señora pasear cubierta namás polos sous deguechos. Yera Peeping Tom, el mirón, el traidor, el malu de la l.lienda.

Ya la hestoria termina bien: al final la xente ganóu ya baxanon los impuestos, mientras s’afitaba la condena moral pal traidor.