la candelaria

Nós como individuos tenemos una perceición propia del tiempu. A veces paeznos una eternidá lo que pa outros yía namás un nadín. Ya tamién aquel.lo que pa nós duróu poucu, pa outros foi un mundu.

??Pero’l tiempu real del molín, el que sigue’l sendeiru que va más al.lá de las perceiciones personales, tien un ritmu implacable ya neutru. En muitos momentos paeznos que cuerre muitu, n’outros que va mui despacín, pero él siempres marcha según indican las estrel.las.

Yá chegóu febreiru, el mes pequenu. El fríu sigue, anque con sorpresas, pero outra vuelta vien la l.luz, el sol chega más ceo ya la nueite mengua. Nesti mundu nuesu del sieglu XXI siempres tenemos l.luz, pero la humanidá vivíu mui escasa d’esti don natural. Por eso nestos primeiros días de febreiru, el pasáu día 2, celebróuse la fiesta de la Candelaria, de la Purificación.

Muertu yá aquel ritual popular de la cuarentena de la mucher antias de volver a entrar nas ilesias, celébranse entovía agora las velas, las candelas, antias tan importantes, pa representar la purificación. Esta idea tan fonda no ser humanu ya que nun falta en denguna cultura del mundu, la idea de purificase contra la escuridá, va perdiéndose nos rituales relixosos. Pero sigue vivísima na vida actual: el cine ya la l.literatura siguen furgando na obsesión humana pola purga, pola l.limpieza de la vida, pol l.lume que nos l.libra de las contaminaciones que pensamos agobian la nuesa existencia.