Musil

Mañana, día 6, cúmplense 137 anos del nacimientu de Robert Musil, el gran escritor austriacu, autor de guapas obras como “Los al.louramientos del xoven Törless” o “Tres mucheres”.

Sicasí, la gran creación de Musil yía “L’home ensin atributos”, una obra bien l.larga, escrita ya reescrita nun treitu de tiempu mui grande, cousa que fixo que tenga un xacer de dispersión ya complexidá. Pero esti aspeutu de fragmentación da tamién un encantu especial a la novela, onde l’autor va esparramando párrafos xeniales polas muitas páxinas que la componen.

Robert Musil asistía al esbarrumbamientu del Imperiu Austrohúngaru, esi momentu especial nel que l’epicentru vienés tantas cousas díu a la piscoloxía, a la l.literatura ya a la filosofía. El desaniciu del imperiu foi un fracasu históricu, pero tamién un chanteiru fantásticu pal mundu de las ideas ya del arte.

La guapura d’esta obra va más al.lá de ser testigu d’una época hestórica: Musil cuenta de forma tan sorprendente como atractiva los misterios ya las esquinas de cousas como l’amor (especialmente na figura de l’harmana del protagonista, Ulrich), la polémica que xune ya estrema los grupos, la seducción pol mal. Un protagonista que nun tien marcas positivas de virtú, un héroe al revés.

Por supuestu, unu de los monumentos l.literarios del sieglu XX, que val pa esti nuevu sieglu nuesu, nel qu’afonda la esplosión bizantina de los valores ya de las creencias. Escritu por esti home de Klagenfurt, na Carintia xermana que roza los eslavos del sur.