Símbolu del amor na tristura
Como esti anu yía bisiestu, tuvimos un 29 de febreiru. Esti día resultóu interesante a lo l.largo de la hestoria: por exemplu, el 29 de febreiru de 1504, en Xamaica, Cristóbal Colón salvóu la vida de los náufragos que diban con él no cuartu viax. Los nativos xamaicanos daban comida a la xente de Colón, pero más tarde dexanon de faelo, de manera que los españoles podían morrer de fame.
Perguntóuse Colón cómo l.lograr que los nativos alimentaran a la sua xente ya alcontróu la solución gracias a la sua sabiduría astronómica. Deprendiera nos l.libros la trayeutoria de los planetas ya sabía que nesi 29 de febreiru diba a haber un eclipse de l.luna. Avisóu, entós, a lo xamaicanos de que los dioses andaban mui enfadaos porque maltrataban a los españoles ya que cuando chegara’l día 29 la l.luz de la l.luna apagaríase. Los nativos riénonse, pero al ver l’eclipse d’aquel día asustánonse ya entós Colón dixo que diba a ponese en contautu conos dioses pa que los perdonara. Al terminar l’eclipse, aseguróu Colón que los dioses perdonarían a los xamaicanos ya volverían a ver la l.luna con normalidá si trataban bien a los españoles. Estos, entós, recibienon alimentos a farta hasta que los rescatanon.
Nun séi si aquel eclipse fuera de los roxos, cuando la l.luna se pon un poucu colorada. Dalgunas veces la imaxinación popular pensóu que la l.luna bermecha yera buena, pero en xeneral asociábase la l.luna encarnada cona sangre, qu’anunciaba más bien la muerte ya la desgracia. En dalgunas culturas creyíase que los eclipses yeran el resultáu de la guerra entre los astros: pensaban que’l sol dedicábase a comer la l.luna. Ya a veces yera un l.lobu o una pantera, un animal salvaxe, el qu’atacaba al satélite cuando arroxaba.
Yía interesante’l xéneru de la l.luna. Na l.lingua alemana tienlu masculín, ya asina Nietzsche acúsala de ser como un monxu que camina silenciosu por sendeiros d’estrel.las, rondando cobardemente las ventanas de la nueite. Pero pa nós la l.luna yía una mucher. Esforzánonla, asaltanon la sua intimidá con aparatos metálicos ya divulgan los sous secretos más fondos, pero la l.luna sigue siendo’l nuesu pálidu deséu, que vien fiel ya melancólica a la cita.
La l.luna, mucher que yía quien a mover la inmensidá de los mares ya tamién l’océanu de las emociones que viven en nós, anque nun las conozamos. Un día, no sitiu onde nací, dalguién quixo apoderase de la l.luna, porque la l.locura acompaña siempres al amor. Ya you, más al.lá del xéneru, como outru escritor clásicu alemán fixera, digo güei en voz baxa: «L.luna, querida mía, tu sos el símbolu del amor na tristura».