Hacia las estrel.las (Ad astra)
Va unos meses que chegóu la película «Ad Astra (Hacia las estrel.las)», de J. Gray. El protagonista viaxa a Neptunu pa salvar al mundu d’una amenaza cósmica, porque igual que nos matan virus invisibles, tamién hai asteroides ya outros macroseres que puen desanicianos nun instante.
La mayoría de las películas de ciencia-ficción paécenme chatarra, pero hailas que son obras maestras. Yíalo esta del direutor J. Gray, porque nel.la, ente outras cousas, adénsanse bien de resclavos o rastros de mitoloxías, cuentos populares ya hestorias l.literarias nuesas.
En dalgunos cuentos de la tradición oral un fichu marcha pol mundu alantre p’atopar al padre qu’afuxera de casa. Pasa por cabanas con caldeiros de bruxa, por castiel.los encantaos ya por puentes colgantes de plata hasta alcontrar al padre traidor, el qu’abandonara la familia. Asina tamién l’astronauta Roy viaxa a una nave perdida alredor de Neptunu, onde vive, solitariu, aquel qu’enxamás echara de menos al sou fichu.
En «El corazón de la escuridá», la gran novela de Conrad, descríbese un viax a los Caldeirones, al Infiernu, onde un home, al.louriáu ya cruel, gobierna un mundu chenu de terror. Roy chega tamién a la nave perdida onde’l padre matara a tola tripulación en ficias de siguir el sou destín de ver vida intelixente fuera de nós. Un monstruu ensin sentimientos.
¡Qué difícil yía escribir una hestoria que nun siga los pasos de la Odisea d’Homero! La Odisea yía esi molde primariu ya inevitable de toda creación l.literaria, al faer una xuntura ente los pasos ya peripecias de la vida ya los sentimientos del sudoku orixinariu del padre, la madre ya la descendencia: Ulises, Penélope, Telémaco. Roy viaxa pa ver esi primer misteriu de la esistencia humana que yía la relación con un padre. Vivir p’abrir el repuelgu, la cicatriz de la independencia que dexa l’amor filial, orixe prístinu de la visión del mundu. Axustar las cuentas con aquel padre, o seya, con él mesmu.
Si’l nial primeiru non prestóu, Roy vivirá mal a gustu na Tierra. Tendrá qu’atopase a sí mesmu no espaciu que ta más al.lá de los planetas. ¡Cómo presta esti periplu cinematográficu ya intimista, contando en voz baxa l’alcordanza del padre! El final yía positivu: el viax a las estrel.las sana la mancadura ya abre la puerta a una vida chena ya auténtica. Outramiente, las estrel.las son materia vulgar, son estúpidas ya nun saben nada de sí. En realidá, somos nós los creadores de las estrel.las. Bril.lan gracias a los nuesos suenos. Pero, entós, si namás nós las queremos, ¿qué será de las estrel.las cuando’l ser humanu desapaeza, cuando faltemos nós?