Vuelve la ondina: del Sil a Alexanderplatz

Las sirenas de la Odisea yeran seres peligrosos qu’axuntaban l’amor cona muerte. Cuéntanos Homero que xunto a el.las había una montaña de güesos podres, que nun yeran outra cousa que los restos de los homes qu’el.las seduxeran. Estas mucheres imaxinadas ya ambivalentes, que xunían el bien ya’l mal, yeran namás una de las muitas categorías que la fantasía popular fixo en cada val.le ya en cada país a la medida de la xente.

Sentí you mui bien d’hestorias de mozas con deguechos d’ouru que vivían al pía de las auguas de los montes altos, siempres como protagonistas de dalgún encantamientu. Pero anque las ninfas prefieren las l.lagunas altas, güei alcuérdome de que tamién el ríu guarda nas suas auguas outras mozas fantásticas: las ondinas.

Nuna parte del Altu Sil, cerca del pasu pol que los osos cruzan el ríu, hai un sitiu que dende qu’hai memoria chaman Las Ondinas, un nome poéticu qu’agora val d’etiqueta tamién pa una central que produz enerxía. Dende cuantayá creyíase que nas auguas d’esta parte de Las Ondinas vivían unas ninfas que, un día cualquiera, salían pa namorar a un home. Yeran felices cuando l.lograban esi amor, pero cuando él perdía la pasión amorosa, entós el.las lu mataban ya, darréu, volvían al pozu del ríu.

Alcuérdome güei de las ondinas porque yía reciente l’estrenu de la película alemana “Undine” (ondina), protagonizada por Paula Beer ya Franz Rogowski. El direutor yía Christian Petzold ya cuéntanos la fantástica hestoria d’una ondina que, cuando la abandona aquel del que taba namorada, tien el destín de matalu pa volver outra vuelta el.la a aquel.las aguas del ríu onde naciera. Esta Ondina vivía en Berlín ya entamaba cursos en cuantas a cómo faere’l diseñu urbanu de la ciudá. Yera feliz caminando por Alexanderplatz ya fayendo l.largos paseos embaxo las techas. Pero la fuerza inesplicable del desamor, propiu tamién d’esti universu cosmopolita, l.levóula al cercanu mundu de la muerte, de manera que la película “Undine” yía noir, yía romántica, yía fantástica, yía surrealista, yía muitas cousas.

Las ondinas, que pasaran tantu tiempu dormecidas embaxo las auguas, andan agora, nun séi por quéi, revueltas ya saltando pa la ouriel.la. Resulta que tamién nestos meses salíu una ondina del Sil ya fai, con unos cuantos mozos (El Cudoxu) de Palacios ‘La risa de la ondina’, una hestoria audiovisual que navega agora polas redes sociales. Pa esta ondina nun chegóu la hora del desamor nin de la muerte. El.la vive feliz al l.lau de los feleitos. Esperemos qu’enxamás chegue pa el.la la tristura, porque vive nuna tierra que sabe disolver la traxedia na ironía.