Gimpel, el tontu
L’escritor Isaac Bashevis Singer, que murríu a estas alturas del branu del anu 1991, ganóu merecidamente en 1978 el Premiu Nobel. Singer escribía nuna l.lingua mui minoritaria: el yiddish. El yiddish, que tenía en cuantas al vocabulariu muita influencia del alemán, yera l’idioma más usáu por millones de xudíos d’Europa central, de los qu’agora atestigan la sua presencia más bien los cementerios, pola mor del desaniciu que fixeran los nazis.
Nos testos d’esti autor apaez la vida diaria de la xente xudía de Centroeuropa. Lleere las suas obras enséñanos cómo yeran los ritos, la fiesta ya outras cousas de la cultura, bien rica ya interesante, de los hebreos que dende cuantayá s’asentaran por Alemania, Polonia, etc. Pero tamién yía un autor estraordinariu describiendo cómo yía’l pensamientu, las indecisiones, las al.legrías ya las tristuras de la xente en xeneral.
Hai cuentos a esgaya de Singer que tienen muita calidá, anque you alcuérdome güei especialmente d’aquel chamáu «Gimpel, el tontu», que yía’l primeiru de la obra espublizada con esi mesmu títulu. Los que vivimos nun pueblu sabemos que yera una figura del paisaxe la del tontu del pueblu, el que sufría las burl.las ya la maldá de la xente que nun se tenía por tonta. Asina lo diz la tradición oral, onde tenemos cuentos a esgaya de tontos ya mediu-tontos. Unas veces el tontu corta la cana del árbol onde taba sentáu, outras veces entra na ilesia ya manda cal.lar al cura, outras veces nun atopa’l burru no que va montáu. En dalgunos casos el tontu regala tolas cousas de casa ya arruina a la sua familia ya xeneralmente fai al revés lo que tien que faere.
Gimpel, el tontu de Singer, tien un perfil más l.literariu, pero yía’l tontu del pueblu. Yera la risión de los vecinos. Engañábanlu tous ya él creyía que yera verdá si dicían que la l.luna cayera pal suelu o qu’había un tesouru ail.lí mesmu. Gimpel yera fuerte ya podía valtar a tolos que lu ridiculizaban, pero él pensaba que nun merecía la pena tomar en seriu aquel.las bromas, anque s’aproveitaran d’él. En realidá Gimpel sabía que yera mentira lo qu’escuitaba, pero él pensaba que nun compensaba enfrentase a la xente ya dexaba correr las cousas. Probablemente los que se rían d’él ya lu maltrataban faíanlu pa curar la sua desgracia ya la sua miseria interior. Probablemente aquel «inocente» del pueblu fuera más feliz que los que disfrutaba fayéndo-l.ly el mal.
«Gimpel, el rabinu acaba de parir un xatín sietemesinu». Ya Gimpel creyía esa hestoria, porque, pensaba él, empiezas desconfiando d’una cousa ya terminas nun creyendo en nada, nin siquiera en ti mesmu.