La mucher pícara
L’árbol, el ser vivu gracias al que somos quien a alitare, yía’l qu’agora reina na plaza de la Pícara Justina. Concretamente, paezme que l’árbol que manda nesta plaza yía de la familia de los pláganos (‘acer pseudoplatanus’), que va xuniendo las suas canas a los outros compañeiros ya asina forma como una especie de teitu vexetal cuando amiramos pa esti requexín de la ciudá.
El l.libru «La pícara Justina» (que tiene un títulu más l.largu) publicóuse nel anu 1605 ya yía probablemente la obra l.literaria más importante xunida a la ciudá, anque nun ta esta obra, paezme a mi, reconocida no que val na sua tierra, igual por un sentimientu d’inferiorá. Tuviera repercusión fuera d’España, especialmente n’Italia, Francia ya Inglaterra ya discútese quién fuera’l sou autor. La crítica d’anguanu nun descarta que fuera obra d’un escritor d’aiquí, porque na novela coméntanse, xeneralmente de forma humorística ya con burl.la, la personalidá de la xente de la zona. Claro qu’hai autores tan centralistas que piensan que Mansilla, l.lugar de nacimientu de Justina, refierse en realidá a Valladolid (!).
Sicasí, nun yía fácil la l.lectura d’esta novela picaresca: fai falta dase cuenta de que respuende a los gustos de la sensibilidá barroca. La protagonista, Justina, yía una mucher que nun aceuta las convenciones sociales ya prefier la sua l.libertá a tener que tar umbaxo’l xugu de la norma. Al l.leere agora esta novela suel plantegase si nel.la podemos alcontrar o non la semiente del feminismu: esta yía una cuestión complexa, porque aplicar las nuesas categorías de güei a los testos de van cuatro sieglos puei significar sumise n’anacronismos conceutuales. Una consecuencia de lo difícil que yía valorar testos non fácilmente conmensurables yía que la obra tien aspeutos que pa dalgunos críticos son ‘feministas’ mientras qu’outros ven nel.la mui bien de pensamientos misóxinos. Apaecen claramente xuicios ya ideas onde queda infravalorada dafeitu la mucher, pero, al mesmu tiempo, la vida de Justina nun dexa de sere una reivindicación de la independencia de la fema respeuto a la dominación del home.
Lo que me chama l’atención yía que la independencia de Justina afítase nos rasgos propios de la mucher, nos atributos del perfil femenín. Mientras que muitos ideólogos ya ideólogas ven la l.liberación de la mucher como un sendeiru que debe terminar en sere cualitativamente iguales que los paisanos, en Justina vemos un modelu distintu: ser l.libre, pero a partir de la forma femenina, non como un ente masculinizáu. Pero esta cuestión yía difícil ya fai falta que’l molín la muela con más espaciu.