L’espía del carbón

Alcontranon na casa del ximielgu los «xuguetes», como diría John Le Carrée, conos que daba informes al Este en cuantas a l’actualidá de la cuenca minera. Él trabachaba a escondidiel.las pa mandar datos de cómo taban las griescas pola mina. Sicasí, la cousa del ximielgu del mieu amigu nun terminóu mal, porque vienon que yera un inxenuu idealista ya que’l sou trabachu yera puntual ya personal: nun taba dientro del esquema ya del aparatu del espionax. La familia respiróu.

A mi estas cousas d’espías suénanme a película ya a novela, pero, anque nun m’interesan por sí mesmas, busquéi dalguna información superficial. Paez que pola mor de la Guerra Fría la zona alta del Sil yera entovía un oxetivu estratéxicu ya importante xeopolíticamente. Daquel.la, el carbón que salía de la mina siguía siendo imprescindible. Los paros de los mineiros frenaban la producción de la economía ya mientras el gobiernu trabachaba pa controlar la situación, los axentes estranxeiros atropaban información en cuantas a la estabilidá del sistema ya la posibilidá d’un cambiu políticu. Anque’l bloque del Este taba arruinándose dafeitu, siguía teniendo interés pola situación social española. Tamién las potencias occidentales afalaban información respeutu a la economía ya la oposición en ficias de lu que había faese cona chegada inevitable de la democracia. El gobiernu trabachaba pa informase na cuenca minera cona policía ya’l SECED (Servicio Central de Documentación). Pero la más l.literaria fuera la intervención del poderosu MI6 británicu, mui atentu daquel.la al futuru español. You nun soi hestoriador nin m’interesa afondare nestas cousas, pero hai informes de que l’espionaxe británicu usaba como una canal d’información a los turistas ingleses que visitaban el tren Ponferrada-Vil.lablinu como xoya del ferrocaril tradicional. La estancia na nuesa zona pa estudiar aquel guapísimu tren aproveitábase pa recocher información pal MI6 (Military Intelligence, sec. 6). Conocí dende mui nenu aquel tren: el Mistu, el Corréu, el Jaimito. You pasaba días enteiros xugando alredor de la estación de Palacios, que yera guapísima. El xefe de la estación dexábanos amirar los aparatos, la cousa de las «agujas». Corríamos polas vías ya praos d’alredor, por L.lazos, embaxu de Las Molineras. Anos más tarde, no mieu primer viax a Inglaterra, vi qu’aquel.la estación de Palacios yera ximielga de las qu’había por muitas zonas inglesas. Agora la estación ta abandonada, igual que tou aquel patrimoniu industrial. Madrid abandonóu aquel.los val.les que tanta riqueza dieran. Ya agora nin siquiera tenemos yá espías con nós.