El modroñu ya la memoria
Una de las películas que más me prestóu d’Ingmar Bergman yía la que se titulaba en castel.lanu Fresas salvajes. Si dalguna vez se puxera na l.lingua que you sentí de pequenu, el sou títulu sería Muruéndanos o El sitiu de los muruéndanos (Smultronstället), porque ‘muruéndanu’ yía’l nome que tien, onde you nací, la fresa de monte, aquel sabor intensu que guardo de la infancia. Según dalgunos l.lingüistas esta palabra vieno del mundu anterior a los romanos, ya, si esto yía asina, seguramente seya harmana d’outra palabra que you sentí de pequenu: ‘modroñu’, que yía lo qu’en castel.lanu chaman «muérdago».
La memoria va perdiéndose ya muerren palabras antiguas. Agora na nuesa tierra la xente suel chamar «muérdago» a lo que los viechos chamaban ‘modroñu’ (nun confundir cono «madroño» castellanu, que nós chamamos ‘borrachín’ ya yía un vexetal mui distintu). Cona palabra nueva cheganon tamién outras tradiciones del norte d’Europa.
El nome científicu del modroñu (o seya, el «muérdago») yía Viscum album, que yía una planta parásita que chupa la savia de dalgunos árboles. Clávase no troncu d’outru vexetal ya aprovéitase de la sua esencia. Yía guapa ya tien como frutos unas bolinas blancas ya un poucu trasparentes que maduran al terminar l’outuenu.
You nun escuitéi a la xente viecha de por aiquí comentar que’l modroñu tuviera dalguna propiedá especial, pero agora cheganon a nós las costumes viquingas, que tán yá bien afitadas ente la xente ya axuntan distintas creyencias. El modroñu yía, en definitiva, un amuletu, una cousa máxica pa defendese del mal. Ponse na puerta de casa pa que los males nun entren na nuesa familia, igual que la ferradura se ponía a la entrada d’una cabana o l’augua bendita diba pa la corte pa defender los animales de casa. Tamién puei colgase n’outras partes de la vivienda, pero enxamás tien que tocar la tierra: él mesmu yía especial porque nun naz no suelu. Yá na antigüedá valía’l modroñu pa fomentar la fertilidá ya por esta razón las nuevas tradiciones anglosaxonas xunen el modroñu, el beisu ya l’amor.
Pa estos rituales del modroñu yera importante’l día de Santa L.lucía, cuando s’aproveitaba pa faer la ceremonia de queimar el modroñu viechu que se colgara por casa: las chamas consumen tolos males viechos que l’amuletu espantara.
Al terminar esti anu recibo you del modroñu (agora chamáu «muérdago») un regalu mui importante: el propiu nome viechu, un milagru del tiempu. ¡Que siga’l modroñu defendiendo la memoria! Porque nun hai dengún mal más terrible que perder los recuerdos ya las palabras. Eso yía dir perdiendo la identidá ya la vida.