EL MOLÍN DEL TIEMPU
Papu guapu
Detalle de la portada del libro de R. Lellep sobre el bocio endémico, con ilustración de Legazpi.
El bociu endémicu yía una enfermedá propia de países muitu probes, pero entovía anda rondando pol noroeste de L.lión. El Diario de León (22/11/2002) alertaba de que, nel sieglu XXI, por esta zona muitas mucheres embarazadas padecían de bociu endémicu, popularmente chamáu el papu. Proponíase que se consumiera más sal yodáu. «Yía un problema de salú pública que tien que solucionase», dicían los médicos qu’estudianon el casu. Más tarde, en 2006, el mesmu diariu (17/12) afirmaba que siguía habiendo un déficit importante de yodu na población del noroeste de L.lión. Nun congresu médicu d’endocrinos de toda España fíxose la ‘Declaración de Ponferrada’, onde se reclamaba a l’autoridá sanitaria una campaña d’información ya prevención pa consumir sal con yodu. Ya pidíase un especial cuidáu conos nenos, a los que más mancaba la malnutrición.
Gregorio Marañón ya outros médicos españoles con muita autoridá fueran los responsables de que no sieglu XX s’abandonara a muita población rural, anque había profesionales estranxeiros qu’alvirtieran de que yera una barbaridá non curar esi mal, que podía tornase con dalgo tan fácil como «un poucu de sal». Aquel.los son responsables de qu’entovía nesti sieglu siga dalguna xente con bociu endémicu.
La bioantropóloga americana Renate Lellep fixo un estudiu mui valoratible d’esta cuestión afitándose nun trabachu etnográficu en zonas asturianas con esti problema. Ya de resultas de la investigación espublizóuse en 1990 un l.libru tituláu «Una simple cuestión de sal. Etnografía de la deficiencia nutricional en España». Desgraciadamente, nun se traduxo al español. Una mozadina de sal, escribía l’autora, bastaba pa curar esta enfermedá, pero pa las élites urbanas la xente de los pueblos siempres foi una clas inferior.
Como la vida yía corta ya val muitu, los humanos hasta na enfermedá buscamos felicidá ya formosura. Sabemos que’l mal yía la causa de páxinas de l.literatura sublime. Ya la xente de los val.les víctimas d’esti bociu foi quien a sublimar ya a alcontrar la guapura nas mucheres con el papu grande. El papu terminóu siendo un atributu de perfección. El papu grande daba un aire vital, primorosu, feliz: la cara flotaba como un queisu de l.luna.
Conocí de pequenu a mucheres papudas muitu guapas. Outra cousa yeran los paisanos papudos, a los que you tenía pánicu porque me dicían que guardaban no papu a los nenos que comieran. Ésti yía’l gran méritu de la cultura humana: construir la vida ya la felicidá a partir de lo que tenemos, por probe ya ruin que seya. Porque namás hai lo que tenemos ya’l molín del tiempu nun nos dexa esperar.