L’embeligru

E l nome castel.lanu «ombligo» vien del l.latín UMBILICUS, mientras que you, de pequenu, escuitéi siempres «embeligru», que vien de la variante l.latina IMBILICUS. Entrambos nomes son guapos, pero a mi préstame más el nuesu, que paez indicar el sendeiru a un sitiu misteriosu, que nun conocemos.

L’embeligru yía una pequena parte de nós, un accidente xeográficu no centru del nuesu cuerpu. De nenos l’embeligru paez un sitiu raru, difícil d’entendere, hasta que nos deprenden que yía’l repuelgu, la cicatriz que queda del remu (‘cordón umbilical’) que nos xunía a la nuesa madre ya nos cebaba. El remu desapaecíu ya agora quedemos solos, solitarios dafeitu, queriendo dar un fin a la nuesa vida. L’embeligru yía’l son primordial que queda del pequenu «big bang» que foi la nuesa chegada a la esistencia. La teoría del aniciu del universu importa, pero tamién la constitución de los nuesos güesos, que vinienon d’outru ser, del que nos despegamos como la nave espacial afuxe de la tierra.

De pequenos intuimos que nel embeligru hai un misteriu ya rascamos ya buscamos, porque namás nacere queremos sabere, como pensaba Aristóteles. Pero dícennos que non, que lu dexemos tranquilu, que podemos mancanos pol ansia de sabere cómo yía la fondura qu’hai na nuesa persona.

L’embeligru ta nel centru de nós ya tien formas caprichosas. Hai descripciones poéticas ya eróticas del embeligru, como la que fai «El Cantar de los Cantares» nunas l.linias de traducción mui discutida: «El tou embeligru yía como la escudiel.la de la l.luna, siempres chena». ¡Qué guapa metáfora!

Pero tamién hai dalguna poza siniestra, como’l chamáu «Embeligru del mundu»: un furacu inmensu n’Asia central, onde naide yía quien a volare, porque la fuercia del mal sume ya afuega a tolos seres no magma de los Caldeirones.

L’embeligru yía tamién símbolu de poder. Cuzco, la capital inca, debe’l sou nome a que yera l’embeligru del imperiu ya ‘México’ significa «l’embeligru del l.lagu de la l.luna». Las capitales de los imperios yeran siempres embeligros del mundu onde la piedra ritual xustificaba ya arramaba la sangre. Dalgunas d’esas capitales quedan de pía, outras valtanon ya sumiénonse nas arenas o nos matos onde nun somos quien a entrare.

La civilización griega yía l’embeligru por antonomasia ya sigue siéndolo entovía como eix ideal del arte ya del pensamientu: un centru superior a tolos demás, anque agora seya piedra rota onde nun suena’l suenu d’Antígona. Fai falta volver un día a Grecia, l’embeligru primordial, ya alcontrar la finalidá de la vida, que quedóu sola, solitaria en despegándose del aniciu, del orixe.