Broch

Cualquier ambiente puei valir pa l.leere l.literatura. Hai l.lectores que l.leen mui a gustu nun bar onde hai bien d’estrueldu ya voces. Hailos que namás yían quien a l.leere si s’alcuentran arrodiaos de muitu silenciu. Outra xente prefier una música concreta mientras pasa las páxinas. A outros puei prestanos sentire dalgunas cousas de la naturaleza. You, por exemplu, siempres l.leí muitu bien si al mieu l.lau sonaba l’augua, especialmente la de los ríos. Muitas de las mias l.lecturas fueran pol branu a la ouriel.la d’un ríu grande, como’l Sil. Dalgunas epecialmente prestosas fixéralas al l.lau del augua de las ol.leras ou de las sonces corrientes de los pequenos ríos que s’escuelan pola parte alta de la montaña.

En marchando del mieu val.le foi a vivire al l.lau del mar ya ail.lí atopéi outru son de la naturaleza mui acordias pa l.leere aspaciu ya saborguiando la palabra escrita. El primeiru l.libru que l.leí aveiráu onde ruxen las ondas del mar fuera “La muerte de Virgilio”, de Herman Broch, unu de los grandes escritores del sieglu XX. El testu d’esta obra de Broch yía d’un barroquismu que sorprende mientras nos presta, porque pon nos nuesos güechos el poder estéticu de la palabra, samarguchando nas ruedas más fondas que faen que’l l.liguax convierta’l conceutu en guapura. Criticóuse que los testos de Broch tuvieran demasiada floración, pero pa mi aquel.los bril.lantes restal.los de la l.lingua diban al son del ruxrux de las ondas del mar, tamién clavadas no más fondu de la memoria coleutiva. Hermann Broch nacíu nestos días primeiros del penúltimu mes del anu, en 1886, na ciudá de Viena. Yera d’una familia burguesa xudía ya’l sou padre fuera un gran empresariu. El sou interés pola filosofía, la matemática ya la l.literatura l.levánonlu a vendere, cuando tenía unos cuarenta anos, el negociu familiar pa dedicase a escribire. La Gestapo ya l’antisemitismu, esa cueva podre a onde van las almas atormentadas, l.levánonlu a la cárcel ya ail.lí frauguóu la hestoria de las últimas horas de Virgilio, el gran poeta que dulda de si val la estética cuando la sociedá nun tien yá criterios morales pa denunciar el mal. Una trayeutoria asemechada yía la Robert Musil, l’outru gran escritor austriacu, que naciera seis anos antias ya atestigóu l’individualismu ya’l cinismu de la sua sociedá. Broch fixo nos sous l.libros un mui valoratible análisis de cómo la sociedá occidental foi quedando ensin valores morales ya terminóu vencida por políticos demagogos, cousa que dalgunos autores ven, asustaos, como dalgo que pue repitise anguanu nas distintas ideoloxías políticas.