ernest renan

Tenía que ser en Tréguier, na guapa costa de Bretaña, onde naciera Ernest Renan. Nos cabeiros días de febreiru de 1823 nacíu esti autor bretón, unu de los pensadores que mechor entendienon los problemas ya los conflictos del continente nos momentos decisivos del sieglu XIX.

Son muitas las cousas polas que podemos faere alcordanza de Renan. Por exemplu, yía mui valoratible hestóricamente la sua famosa Vida de Xesús, qu’escandalizóu a los sectores conservadores ya a la Ilesia.

Pero si las suas cousas relixosas yá tán güei más bien superadas, chama l’atención que’l sou l.librín ¿Qué yía una nación? sigue siendo una obra de referencia: las cousas qu’escribíu Renan son de muitísima actualidá. ¿Qué yía una nación? yía, en realidá, la versión escrita de la conferencia que Renan diera l’once de marzu de 1882 na Sorbona, en París.

Nestos tiempos escuros onde las griescas entamadas por formas múltiples de nacionalismu nun dexan de repeirar, l.leer a Renan al.luma la nuesa mente.

?El bretón enseña que la mentira yía’l rodenu con que los nacionalismos manipulan el molín de la hestoria. Ya esplica, con bril.lante fondura, que la nación nun depende de la raza, de la hestoria o de la xeografía. «Una nación yía’l plebiscitu diariu que querer vivir xuntos». Un buen consechu: l.leer a Renan outra vuelta pa entender el presente.