Outru branu

Nun séi si tolos nenos. Pero, polo menos, los qu’estudiábamos fuera ya volvíamos al pueblu polas vacaciones de branu sabíamos qu’aquel.los meses tenían un aquel muitu especial. Xugar, xugar ya amirar las cousas incomprensibles que faía la xente adulta.

Esta yía la razón pola qu’esti branu de 2015, que yá ta nas suas últimas semanas, trúxunos una maravillosa novedá l.literaria: chegóu, por fin, la outra obra de Harper Lee: Vete ya pon un centinela.

Nel anu 1960 espublizóuse Matar un ruiseñor (en realidá, el «mockingbird» nun yera un ruiseñor, sinón un sinsonte) ya fuimos quien, con esi magníficu l.libru, a imaxinar aquel.los branos de Scout, fayendo travesuras nun pueblu chamáu Maycomb. Maycomb yía una población ficticia, pero representa muitu bien el sur norteamericanu, especialmente’l que siguíu a la Gran Depresión. Sicasí, como siempres, lo fiel a la realidá pequena yía tamién fiel a la esencia xeneral del ser humanu.

Scout, el sou harmanu Jem ya l’amigu Dill descubrían, mientras xugaban, el dramatismu que siempres marca la vida de los humanos.

El que nun l.leíu esta guapísima novela seguramente pudo vere la película del mesmu nome, esa que tien como protagonista a Gregory Peck nel papel d’Atticus Finch, exemplu d’honradez ya valentía ya referente éticu naquel mundu difícil. El Sr. Finch, Scout, Jem, Dill, Calpurnia… Nun seremos quien a olvidar estos personaxes, que yá son parte del nuesu mundu. Esti branu fuimos quien a revivir esti universu, revivilu outra vuelta.