En marzu entama la cousa

Peme que’l reflán más l.largu que conozo yía’l que diz:

Marzu nialarzu,

abril guviquín,

mayu paxaral.lu,

San Xuan volarán

ya por Santa Marina canta la paxarina.

Esti proverbiu, que tantas veces escuitéi de pequenu, describe’l ciclu vital de la vida, nesti casu conos páxaros como representantes de la mesma.

Por abril los güevos entaman a cocer de vitalidá, por mayu los paxarinos feos pol plumón abren la bouca a la vida. Por San Xuan, el mes que va detrás de mayu, yá deprendieran a volar las crías. Ya por Santa Marina las aves tán chenas de plenitú vital.

Pero foi importante marzu, l’aniciu de la vida nos árboles ya matos. La parexa fértil necesita una casa: el nial. Ya’l nial suel ser cousa de marzu, un mes que val como punta del filu que describe la existencia d’estos animales, los páxaros.

Imprescindibles pa los humanos, los páxaros son una de las al.legrías más grandes que pue danos la existencia. El.los nos divierten conos sous cantos, dibuxan el cielu cona sua voladera, son testigos de que la vida tien una música propia ya natural.

Ya tou entamóu por marzu. Un mes que paez antipáticu: chuvias fuertes, dalguna nevada seruenda, airón molestu, sol que yá manca… Pero, en realidá, principiu de la vida, entamu de la guapura.