Ellery Queen

El día 3 d’abril de 1971, o seya, van 45 anos, murríu en Nueva York Manfred Bennington Lee. Pouca xente conoz a esti escritor por tal nome, pero son muitos los l.lectores a los que sí-l.lys suena por demás esti outru apelativu: «Ellery Queen».

Manfred B. Lee ya Frederick Dannay fueran los creadores del famosu personaxe de novela policiaca chamáu Ellery Queen. Escribienon entrambos muitas novelas ya narraciones pequenas onde bril.la siempres la intelixencia de los investigadores Queen pa solucionar los crímenes que paecen enigmas escurísimos.

Ellery Queen ya’l viechu Queen, padre ya fichu, van pousando no tableiru las piezas del misteriu pa chegar a una solución basada na lóxica más estricta, anque siempres con un aquel de guiños l.literarios a figuras clásicas.

Alcuérdome del primer l.libru que you l.leí d’Ellery Queen. Chamábase «Ya nel octavu día» ya yera una guapísima hestoria de misteriu resuelta de forma mui prestosa. Outros l.libros l.leí más tarde: «El misteriu de los harmanos siameses», «El gatu de muitas colas» ya un etcétera muitu l.largu.

Siempres l.logranon estos dos autores dar forma a una atmósfera d’interés ya misteriu que namás el cálculu racional yía quien a destapar. Ya asina esti investigador yía una figura relevante nel olimpu de los grandes ya carismáticos de la novela de misteriu. Dende aquel primer Sherlock Holmes hasta outros bien queridos como Hercules Poirot, Philip Marlowe, Gideon Fell, Perry Mason, Adam Dalgliesh, Jules Maigret…