lAS bRAÑAS

Yá esnevia. Yá marcha tamién el xelu. Por mayu, la primavera muel el tiempu con días más grandes ya nueites más pequenas. Los montes faen nueva la sua sangre, los caminos bril.lan cona nueva l.luz.

Cambian, entós, muitas cosas: los xardones, los bedules. Tamién cambian las brañas, qu’agora despiertan del suenu l.largu del iviernu. Aparentemente inmóviles, el.las van trasformándose al son de la yerba ya de la piedra, al aquel de la nuble ya del sol.

Las brañas. Guapísimas creaciones de los nuesos antepasaos. Vienen de los tiempos primeiros, de la espansión humana nos montes altos ya difíciles. Vienen d’aquel.la alcordanza primordial. Porque cuando cona memoria queremos dir al orixe, a la fuente prístina de nós, chega la figura de la braña ente la nublina ya la nieve, ente la l.luna ya las estrel.las.

Con cabanas feitas pola sabiduría, con l.lousas viechas como los val.les, con ventanos que cuidan del fríu ya de la l.luz. Con regueiros d’augua cristalina, regueiros que cantan pol día ya pola nueite. Auguas maravillosas, que s’alcuerdan entovía d’aquel.los bidones chenos del l.leite recién muñidu. L.leite que resumía los esfuerzos, las al.legrías ya las penas de la nuesa xente.

Brañas tamién de la fiesta, de la celebración, de los ramos, de la foguera ya del amor nueitiegu. Cabanas que serán siempres testigos d’una hestoria escondida, humilde, pequena. Pero, en definitiva, la hestoria nuesa.