El sabugueiru

Yá pasóu San Xuan, pero los sabugueiros siguen al pía de los nuesos caminos. Las suas flores, que bril.lanon esta primavera, entovía al.lumarán cona sua blancura los días del mes de Santa Marina.

Cuando vaya terminando’l branu saldrán los frutinos prietos ya pequenos, que seremos quien a ver entovía pol outuenu. Asina que tenemos toul branu pa disfrutar d’esti arbolín tan guapu ya tan apegáu a los caminos. El sabugueiru al.légranos la vida na mitá caliente del anu. Ya cuando dexa de bril.lar yía porque ta acercándose la friura del iviernu.

El sabugueiru yía un arbolín humilde. Nun yía mui altu, pero yía mui resistente. A veces los amos de los praos quieren desanicialu porque estorba la paré ou la murueca qu’arrodia las fincas. Pero cuesta muitu descastialu: ta mui afitáu no petuñu, enraigónase con fondura ya determinación.

Yía humilde, pero poderosu pal bien de la xente. Val pa mechorar en males como la tos, las inxinas, el reuma, el fégadu ya muitas cousas más.

El sabugueiru: alcordanza de los tiempos felices de cuando yéramos nenos. Alcordanza de cuando díbamos a cocher las suas flores pa vendelas a los intermediarios de las industrias farmacéuticas. Pagábannos pouco ya costaba muitu axuntar un quilín de sabugueiru. Pero prestaba. Ya toi seguru de qu’aquel sabugueiru al que quitábamos la flor yera cómpliz de los nenos: complaciente dexaba que xugáramos a mayores ya chenu de bondá entregábanos la esencia de sí mesmu.