Desiertu verde

¿Una ciudá ya una provincia de las más guapas d’Europa? Belluno, al norte d’Italia, arrodeada de verde ya de nieve ya l.lendada polos Dolomitas. Belluno t?ien el paisaxe que más pueda estremase del desiertu. Por Belluno cuerren las auguas del ríu Fiave ya nos sous montes viven gran parte del anu las auguas blancas del xelu.

Pues resulta qu’en Belluno nacíu’l día 16 d’outubre de 1906, ou seya, van 110 anos, unu de los grandes autores del sieglu XX, Dino Buzzati. Anque quería la montaña ya escribíu sobre el.la, la sua gran obra l.literaria yía El desiertu de los tártaros . Cuéntase nesta obra la hestoria d’una fortaleza. Naquel fuerte, afitáu na chanura erma de l’arena, viven unos militares, a los que manda’l teniente Drogo. Drogo aspera que cheguen los tártaros pa derrotalos dende la fortaleza.

Pero los tártaros nun chegan. Pasan los anos ya los tártaros nun chegan. Mientras los sous amigos son felices na ciudá ya viven la sua vida, él consume la sua esistencia nun montón de piedras del desiertu. Asperando los tártaros, Drogo consúmese.

Tamién na nuesa tierra, dominada pola montaña ya la nieve, podemos imaxinar el drama de quien aspera no desiertu lo que nun chega. Podemos imaxinar un futuru: la nuesa tierra convertida nun desiertu verde. Una tierra viviendo la ilusión kafkiana d’un combate definitivu ya absurdu: un combate qu’enxamás chegará porque esos nemigos, que pudieran dar sentidu a la nuesa vida, nun terminan d’apaecer nel horizonte.