mITOS YA rITOS

El molín del tiempu l.lévanos güei a un autor del sieglu XX, al rumanu Mirce Eliade, un estudiosu de las formas arquetípicas del pensamientu humanu. Eliade, que naciera nel anu 1907, murríu’l día 22 d’abril de 1986, van trentayaún anos, n’América, concretamente en Chicago, porque na Universidá d’esta ciudá enseñóu, na parte cabera de la sua vida, el sou puntu de vista sobre la hestoria de las relixones.

Yía autor de muitas obras, igual de xacer l.literariu que científicu. Ya la sua dedicación científica vencíase pal estudiu de los símbolos, de los mitos, de los rituales ya de la relixón en xeneral. Anque en determinaos ambientes académicos nun se valora muitu la obra de Mircea Eliade, los sous escritos son bien interesantes ya suxerentes.

Los mitos son l’asimilación que l’home fai de la realidá ya los rituales son la práutica concreta, la realización teatral d’esa creencia cona que l’home quier alcontrar el significáu de las cousas.

Ya esti asuntu apaez con especial vitalidá na cuestión de la creencia na divinidá: ábrese asina l’espaciu del territoriu sagráu del pensamientu. Esa provincia onde ayer, güei ya mañana ponemos los humanos el fundamentu de la realidá. Porque tamién la sociedá actual, que paez tan l.luenxe d’esti asuntu, fai, constrúi un mundu sagráu, mui sagráu. Pero con outros nomes.

Los viechos mitos escuéndense en formas nuevas que vienen outra vuelta a xustificar el nuesu tiempu dende’l briezu a la furaca.