La cara escura

Na sua cara escondida tien la l.luna un cráter que se chama ‘Wells’. Correspuende esti nome a un escritor que fixo dalguna aportación a la ciencia, pero que más bien yera autor d’obras de ciencia-ficción. Referímonos a Herbert George Wells, que murríu no mes d’agostu de 1946, o seya, van 71 anos.

??H. G. Wells escribíu obras de distintu xacer, muitas con un aquel social. Pero yía más bien conocidu polas suas novelas que tienen que vere cona ciencia ya’l futuru. Una de las suas obras yía la chamada «La guerra de los mundos», que supón una Tierra invadida polos marcianos. Esta novela tuvo muitas adautaciones al cine ya a viedoxuegos ya afitóuse n’el.la Orson Welles pa la sua famosa emisión por radio que provocóu una conmoción social ya hasta muertes.

Pero nesta l.linia de ficción H. G. Wells escribíu tamién la novela «La isla del Dr. Moreau». El protagonista chega a un sitiu onde un investigador (el Dr. Moreau) fai esperimentos d’inxeniería xenética: fabrica seres vivos nuevos. Asina, apaecen entes que son combinación, por exemplu, de gochu ya home ya outros fenómenos terroríficos.

Esta obra yía turbadora, tuvo muitas críticas ya calificóuse de morbosa, pero yía una innovadora ficción que trata la cara fosca de la ciencia. Porque la ciencia, igual que la l.luna, tien una cara escura. La ciencia yía más que conocimientu: tamién yía un nial de problemas terribles cuando afuxe del control del home.