Buena Bruxa

Yía un feitu que siempres qu’alguién se mete nuna esperiencia máxica entra nuna realidá misteriosa. Ya nos misterios confúndese la fuerza del mal ya la fuerza del bien.

Diz el molín del tiempu que, n’Europa, el Sieglu de las L.luces foi quien a desaniciar en parte la semiente de la bruxería ya de las creencias máxicas. Pero namás en parte: you cuento en palabras tres imáxentes.

Una primera estampa: la nuesa xente del campu, campesinos ya ganadeiros, tenía siempres una vela encesa, un augua milagrosa o una fórmula secreta pa defendese del mal. Ya visitábase a una bruxa buena qu’ayudaba a los agobiaos pola enfermedá, la ruina o la muerte.

Segunda escena: los voceras de la racionalidá ya de la ridiculización de lo que chamaban “las supersticiones”, usanon siempres las práuticas máxicas. ¿Cuándo? Cuando la cousa yera vital, decisiva: el mal incurable o la inevitable desgracia.

Ya tenemos la evidencia tercera nesti mundu nuesu d’anguanu. La ciencia, la téunica, el cálculu racional paecen dominar la vida. Pero esto yía mentira, yía un engañu, porque los soportes electrónicos son namás una forma. El contenidu sigue siendo mui escuru: vuelven los profetas, la inorancia crez ya los medios ya redes sociales tán chenas de clarividentes, especialistas en cartomancia, astrólogos ya augures. Ya, pa zarrar el círculu, hasta las élites que desprecian a los adivinos viven con ideas máxicas. Porque como dixo aquel clásicu: una cousa yía lo qu’una sociedá piensa que yía ya outra cousa yía lo que realmente yía.