El regalu que nun nos dan ya’l que nos dan

A gora que chega l’outuenu cúmplense los tópicos: caen las fuechas, mengua la l.luz ya escurez bien ceo la tarde. Sicasí, anguano las cousas son diferentes, porque gracias a la tecnoloxía hai filtros que faen más blandu’l paisaxe crudu de la naturaleza. Non por eso somos más felices, nin vivimos más a gustu que n’outros tiempos más probes, cuando la xente taba más indefensa, pero disfrutaba tantu como nós, non menos, de la vida.

Yera l’outuenu de 1910 cuando la inevitable gadañera, la muerte, visitóu ya l.levóu l’alma de Lev N. Tolstoi, al que conocemos más bien como León Tolstoi. Yía unu de los más grandes escritores de la l.literatura universal ya nos testos de sou siempres hai un aquel especial, en tous apaez un matiz xenial.

Al l.lau de las suas obras más conocidas («Guerra ya paz», «Ana Karenina», «La muerte d’Ivan Ilich») hai outras tamién estraordinarias, como los sous testos de la guerra en Crimea de Rusia contra franceses ya británicos. Comentando lo que pasara en Sebastopol, Tolstoi alcuentra más autenticidá naquel.los tiempos de guerra que na vida fácil ya frívola qu’atopóu en San Petersburgo, onde la xente paecía sere feliz desaniciando cualquier semiente de culpa.

Sicasí, outros testos de Tolstoi que se conocen poucu son tamién estraordinarios, como aquel que se titula «De lo que vive l’home». Usando figuras ya personaxes de la tradición cristiana, Tolsoti escribe nesta emotiva ya pequena obra cómo yía la sua visión de la vida humana ya la sua finalidá.

Tolstoi nun tien el defeutu de la inxenuidá. Él sabe muitu bien que na vida humana hai una falta sustancial: l’home nun yía’l dueñu de la sua vida. En naciendo, nun se nos da’l regalu, el don, el beneficiu de controlar la nuesa vida: faemos proyeutos, faemos planes, tenemos ilusiones que cumplir, ya nun nadín cualquier cousa puei quitanos la esistencia. «Pa conocenos a nós mesmos debemos saber lo que nun se díu al home, al home nun se-l.ly díu sere dueñu de la sua vida».

Outramiente, Tolstoi yera tamién optimista: él pensaba que lo que sí tien l’home yía la posibilidá d’ayudar a los outros, la posibilidá de sere solidariu, el sere capaz d’amar.

Una tercera cousa afirmaba l’escritor rusu del ser humanu. Los homes creyen que viven gracias a sí mesmos, gracias a lo que faen. Pero nun yía asina, somos dalgo porque dalguién nos ayudóu, nos cuidóu ya nos amóu: nada sedríamos si nun fuera pola nuesa madre, pol nuesu padre, polos que nos ayudanon ya nos ayudan. Esta yía la base ya la finalidá de la vida humana, ayudar ya que nos ayuden. Asuntu polémicu, pero la guapura l.literaria emburria a dicir que sí.