La formiga ya los formigales

Na ciudá belga de Gante naciera, van yá 160 primaveras, l’escritor simbolista ya Premiu Nóbel chamáu Maurice Maeterlinck. Na sua obra atopamos «La vida de las formigas», onde cuenta aspeutos estraordinarios d’esti animalín, asemecháu al ser humanu pola la sua capacidá de comunicación ya la sua «división del trabachu». Cuando terminéi de l.leere esta obra entróume un poucu de culpabilidá por alcordame de qué manera tan cruel maltratara you de pequenu a esti animal: xugábamos desfayendo los formigales (‘hormigueros’ en castel.lanu). La destrucción l.levábanos tiempu, porque aquel.las pequenas pirámides yeran muitu fuertes ya resistentes ya los formigales refaíanse outra vuelta. Yeran colonias sorprendentes que nin los humanos nin la intelixencia artificial de güei son quien a faere.

Alcordéime tamién del nome del animalín: na escuela ya nos l.libros yera ‘hormiga’, pero la xente dicía ‘formiga’. Tenía you tamién l’alcordanza d’un cuentu que tenía por protagonista a la formiga: un animal grande mandaba ya tenía asustaos a tolos demás, de manera que dengunu podía con él. Hasta que chegóu una formiguina, que se metíu polos sous pelos ya güechos de forma que l’animalón al.lourióu ya tiróuse contra una pena ya partíu la cabeza.

Muitas veces los cuentos populares son hestorias de cómo los animales faen una competición. Suel sere la formiga la que sal ganadora, anque de primeras paez la más ruina. Un día un cuervu ya una formiga compiten a vere quién tien más fuercia ya entós miran a vere cuál yía quien a l.levare una carga más grande ya xubila a un árbol. La que gana yía la formiga, que puxo na mandíbula un granu que pesaba más qu’el.la mesma.

La formiga yía tan trabachadora que los outros animales (la chicharra, el saltasucos, el cuervu) sufren depresión ya vergüenza cuando, al chegar l’iviernu, nun tienen nada que comere, mientras la formiguina aforróu ya aforróu un cuantu. Apaez entós la formiga como un ser mezquinu ya poucu idealista. Maeterlinck rebélase escontra esta visión de las fábulas ya de los cuentos: «las formigas son los seres más nobles, más caritativos, más xenerosos, más altruistas del mundu», escribe. L’autor belga nun se daba cuenta de que nas culturas campesinas la formiga yía una heroína ya nos cuentos suel sere la preferida porque na moral de los paisanos agricultores ya ganadeiros dase muita importancia al trabachu ya a la constancia. Mientras l’aristocracia ya la nobleza faen al.labanza de la violencia, de la espada, de la sangre ya de los animales feroces, pa la xente campesina la l.lei yía la de la xusticia del que trabacha, como la formiga.