Cuando se cortexaba

Cuando la Naturaleza entamóu crear la vida estremándola en dos sexos, el cortexu fíxose inevitable. El cortexu faenlu tolos animales: cortexan los pingüinos, la raposa, el melandru, el xilgueiru, el faisán… Muitas veces, con sofisticación. El cortexu yía un ritual biolóxicu, onde cuenta la danza, el cantu, l’acercamientu a la intimidá ya outras fenomenoloxías interesantes. Xeitos d’amor.

Cuando se cortexaba… Pero ¿en pasáu? ¿Nun se cortexa agora? Sí, pero yá nun presta usar esta palabra: ‘cortexar’. El términu ta volviéndose ranciu ya anticuáu ya búscanse outras espresiones (‘salir’, ‘ligar’, etc.) más acordias cona nueva visión del mundu.

Cuando los nuesos padres ya buelos cortexaban tenían una imaxe del amor bien diferente del amor burgués qu’agora nos seduz dafeitu. Participamos güei de la idea que xune amor ya matrimoniu, pero a lo l.largo de los sieglos mandóu n’Europa outru querer, el de la clas humilde. Yera l’amor un sentimientu que se dividía. La xente nueva, los xóvenes, vivían una etapa ritual de cultu a la guapura ya al deséu: el cortexar como arte difícil, que remesturaba la guerra ya la fusión, la competencia ya la esperanza. Un arte tamién con rieglas fuertes, rieglas que, anque non escritas, el mozu ya la moza tenían que cumplir pa que la cousa chegara a buen fin. Las nueites de ronda, la busca de la solombra.

Pero venía la segunda parte. El matrimoniu de las clases humildes europeas xiraba alredor del interés de la casa, de la producción económica ya la supervivencia: las familias buscaban parexas homoxéneas que puxeran en marcha la empresa de la nueva casa. Ya, xeneralmente, los mozos ya mozas cedían al interés de la familia. Aquel amor ideal olvidábase ya quedaba como un suenu de xuventú, como una novela de pasión perdida.

La realidá imponía la virtú del respetu. Ya esi respetu, al dir pasando los anos, cristalizaba tamién xeneralmente nun auténticu amor: realista, buenu, xenerosu, con fichos que defendían el mundu propiu. Xuntura qu’entamaba pol interés, pero que terminaba n’outra forma d’amor bien guapa ya, tamién, estable, porque nun taba amenazada pola inconstancia del namoramientu instantáneu.

Cuando se cortexaba bril.laba la sublimación, eso que confusamente chamamos ‘romanticismu’, sabiendo que pronto ganaría l’interés del clan familiar. Poucu a poucu entraban nel diálogu las tierras, los praos ya las vacas. Esto paeznos agora intolerable. Pero hemos de tener empatía con un pasáu cercanu: yera, simplemente, outra forma de querer. Un querer que, por ciertu, cumplía la definición del amor: la facienda tamién promete la felicidá.