El sabor de la nieve d’agostu

El molín del tiempu sigue esfayendo los granos de los días ya agora queda yá mui pouco del presente mes. Asoma agostu, muitu cercanu, ya entramos na semana que culminará na fiesta de las Nieves el domingu que vien, el día 5.

De las muitu famosas siete colinas de la ciudá de Roma, la del Esquilino yía la que tien más altura, con 64 metros. Nun picu d’esti outeiru alcuéntrase una de las ilesias más impresionantes del mundu: Santa María la Mayor, seguramente la ilesia más antigua dedicada al cultu a la Virxen. Pero esti templu tien tamién outru nome: Santa María de la Nieve.

Diz la l.lienda qu’un noble romanu ya la sua mucher tuvieran un suenu onde se manifestaba una voluntá de María: quería que l.levantaran una ilesia no monte Esquilinu. El sitiu concretu había ser onde cayera una nevada’l día 5 d’agostu. El papa Liberio escuitóu al matrimoniu ya tamién tuvo esi suenu, polo qu’aquel día de calor marchanon a unu de los picos del Esquilinu. Ail.lí vienon la milagrosa nevada que cayera tal como s’anunciara máxicamente. Empaponaos por aquel misteriu del branu, la xente yera testigu de cómo’l papa Liberio trazóu el perímetru de la sorprendente capa de nieve ya marcóu ónde tenía que faese la primera ilesia dedicada a la Virxe. Pola mor del milagru chámase tamién esta ilesia Santa María de la Nieve ya tolos 5 d’agostu celebrábase’l ritual de tirar pétalos de rousas blancas dende la cúpula. Al afitase la creencia na maternidá de María crecíu tamién la ilesia, que terminóu siendo una ilesiona.

Santa María de la Nieve de Roma yía enorme ya contundente. Pero la l.lienda ya la fuerza de la creencia son entovía más grandes: por Europa ya América la nieve maravillosa foi semando outras ilesinas pequenas ya humildes. You marchéi de pequenu muitas veces, al entamar agostu, a una d’estas ilesias, cercana a la mia casa: el Santuariu de la Virxen de las Nieves, n’Anl.lares, en Páramo del Sil. Valdepráu ya Susañe tamién celebran muitu la fiesta.

La romería alredor del santuariu yera como tolas fiestas: rituales pa la divinidá ya tenderetes, pequenas diversiones ya negocios, inseparables de los ritos. Pero’l molín del tiempu dexóu en mi tres cousas. La primera, la figura del santuariu, que nacía nun paisax idílicu, porque, cerca, el Ríu Valdepráu baxaba de los montes que xunían con Degaña. La segunda, aquel sabor de los dulces ya de los caramelos que nos compraban los mayores. La tercera, el son de dalgún cantar que nos envolvía. Quedan mui vivos la visión ya la música. Pero especialmente indestructible aquel sabor dulce, la memoria del gustu que nos acompañará siempres.