El filu de los burgundios
Diz la «Crónica del Emperador Alfonso VII» que, en morriendo polas idus de marzu de 1126 la reina Urraca, quedóu coronáu como rei na Catedral el sou fichu Alfonso. Vinieran pa xurar fidelidá muitos nobles del reinu, como’l poderosu Suero Bermúdez, que tenía tierras a esgaya («Badabiam et Flatianam», o seya, Babia ya L.laciana, diz el testu de Sánchez Belda) naquel sistema aristocráticu afitáu nel parentescu.
El padre d’Afonso VII casárase cona infanta Urraca siendo el.la una nena ya yera Raimundo de Borgoña, que nacíu en Besançon (Condáu de Borgoña) en 1070 ya murríu con 37 anos en Grajal de Campos, arrodeáu de familiares, como’l sou hermanu Guido de Borgoña, más tarde’l Papa Calixto II.
A mi chamóume siempres l’atención la figura de don Raimundo, que viniera de bien l.luenxe. Chegóu del Franco-Condáu de Borgoña, que yera un poder medieval afitáu na parte este de Francia, a onde fueran a parar los burgundios, una tribu escandinava que sieglos antias marchara por tierras xermanas hasta la zona del altu Ródanu, chamada Burgundia (o seya, Borgoña), que güei pertenez a territorios de Francia, Alemania ya Italia.
Los burgundios marchanon d’Escandinavia va muitu. Yera cuando naquel.las tierras esfrecidas había muita más xente de la cuenta ya asina la población dexaba los sous cementerios ya casas ya baxaban pal sur, emburriaos pola fame. Yera propia de los burgundios una llingua d’aniciu xermánicu, pero al afitase no centru d’Europa esa l.lingua sumíuse nel idioma que yera xeneral na población. Sicasí, dalgunos alcuentran restos d’aquel.la l.lingua xermánica nel idioma chamáu franco-provenzal, qu’entovía alita no que fuera la viecha Burgundia.
Paez que los hestoriadores, afitándose nos datos arqueolóxicos ya d’outra clas, reconocen polo xeneral que los burgundios tienen la sua patria orixinaria no que yía güei la isla de Bornholm. Esta isla alcuéntrase solitaria no mar Bálticu ya, anque ta rixida políticamente por Dinamarca, tien al sur la costa polaca ya pol norte amira pa la xente de la Suecia del sur. La isla tien fama de ser solecheira, dientro de lo que cabe, ya en danés tuvo dalguna vez el nome de «Borghund», que significaría «Monte Altu» pola sua presencia no mediu del mar, anque esti paez más un topónimu deformáu que l’orixinariu. Nel idioma nórdicu más antiguu’l nome d’esta isla yera «Burgundarholm» (ya outros asemechaos), la tierra de los burgundios, que conservanon las suas sagas ya l.leendas al pousase onde’l Ródanu. El caprichu del tiempu xuníu con un filu una isla que navegaba solitaria polas auguas del Bálticu ya un reinu no cume del sou poder.