El picatueru apasionáu

Pola primavera escuitemos al picatueru, un páxaru simpáticu. Yía quien a afuracar la madera d’un árbol con muita pasión, picando hasta 20 veces por segundu; pero nun se manca, porque tien una fisioloxía especial na cabeza. El picatueru tien la sua casina nos furacos que fai nos tueros de los árboles. Ail.lí guarda’l sou nial ya ail.lí asperan las suas crías que chegue la comida. El picatueru afuraca ya tapa, porque pa que nun descubran el nial puei faere una paredina qu’escuende la sua vivienda.

Hai muitas creencias ya hestorias fantásticas en cuantas al picatueru. Los romanos pensaban que’l picuatueru fuera un rei al qu’una diosa convirtiera en páxaru porque nun quixera faere l’amor con el.la. Nos l.libros medievales d’animales tamién el picatueru yía protagonista. No chamáu «Bestiario Toscano» dizse que los picatueros conocen una yerbina máxica que val pa, en casu de nun ser quien cono sou picu a abrir el furacu, romper tolos tapones que pueda habere, seyan de piedra o de metal. Cuéntase entós que los l.ladrones tapan el nial con materia imposible d’afuracar por parte del picatueru, cousa qu’obliga al paxarín a buscar la planta máxica ya guardala umbaxu la l.lingua. Asina’l picatueru va ya abre máxicamente la puerta que tapa la sua casa. Entós los pícaros garran los trozos de la yerbina que cayeran al suelu ya aprovéitanlos p’arroubare ya abrire cualisquier piechu de fierru ya candáu.

El molín del tiempu alcuérdase güei de que se cumplen 80 anos d’una obra filosófica importante: «El ser ya la nada», del pensador parisinu Jean-Paul Sartre. Un l.libru mui valoratible, que tien dalguna cousa sorprendente. Por exemplu, no capítulu cabeiru, antias de las Conclusiones, hai unos pensamientos de Sartre sobre cómo’l ser humanu tien una obsesión por chenar los furacos, tien la pasión de nun soportar el vacíu físicu. Más al.lá de la interpretación freudiana, habría una tendencia fundamental del ser humanu pa tapar, pa chenar los furacos del ser ya tamién p’abrir furacos na naturaleza, anque esta última cousa Sartre apúntala pero nun la esplica («debería analizase la tendencia inversa, la de cavar furacos»). Hai, entós, un doble mandatu: tapar ya abrir. Unas poucas l.linas más alantre vien la frase brutal de Sartre sobre la vida apasionada del ser humanu: «l’home yía una pasión inútil».

Si quixéramos esplicar esto con un cuentu faeríamos la hestoria d’un picatueru como aquel héroe d’una pasión interminable. Va unos meses pudimos escuitar al picatueru afuracar los tueros ya asina siguiremos escuitándolu siempres en primavera, nun bucle inútil que nun chega a dengún fin.