L’amore amable

Enseñara Aristóteles que «el ser puei dicise de muitas maneras». Esto val tamién pa outras cousas: por exemplu, pa las cuestiones del amore. Si nos perguntamos qué yía l’amore, probablemente nun sepamos muitu bien qué dicir. Ya si nun sabemos contestare a esa pregunta yía porque hai formas d’amor a esgaya. O seya, porque l’amor puei dicise de muitas maneras. Al pasu de la hestoria foi cambiando la conceición ya la visión mayoritaria del amore, anque, más al.lá de las modas, la verdá yía que siempres habrá una xente que lu veía d’una manera ya outra xente que lu veia con un xeitu distintu. Hai una visión amable del amor. Hai otra que yía brutal. Haila dramática, turbulenta, siniestra ya haila tamién heroica. Hasta alcontramos versiones épicas del amore, que tien una característica especial: tiñe ya abarca toulos aspeutos de la vida. L’amor tien que vere cona economía, cona razón, cona guapura, cona edá, conos l.lugares ya, por supuestu, cono sentimientu.

Conocere bien una época hestórica, acercanos a una etapa de la humanidá significa conocere tamién cómo yera l’amor daquel.la. Tocante al presente, la cuestión yía sabere que significa güei. ¿Predomina l’amor más bien difícil, l’amor acedu ya, mesmamente, escuru? Si amiramos polo que manda na l.literatura, nel arte o no mundu de la cinematografía, paez que la visión preponderante del amore yía la visión pesimista ya hasta xunida a un mundu distópicu. Dame la impresión, anque esto yía un xuiciu mui personal ya non oxetivu, que la minoría inteleutual que manexa la comunicación global na socieda de güei piensa que l’amor feliz o amable yía una cousa vulgar. Hasta paez que manifestar el fracasu ya la frustración nesti mundu sentimental amorosu significa ser superior. Los escéuticos del amor paecen creyese más l.listos, mientras que los felices, sí, son felices, pero bobos. Sufro, pero soi mechor.

Sicasí, del amor enxamás puei dicise la última palabra. Un poucu por casualidá, descubrí esti branu pasáu la obra gráfica d’un autor francés chamáu Raymond Peynet, que naciera en 1908 ya alcontróu la muerte en 1999. Chamóume l’atención esti autor porque los sous dibuxos ya carteles del amor son mui amables. La obra de Peynet yía muitu interesante, pero poucu conocida fuera de Francia, anque paez que sí yía bien admiráu en Xapón, onde tien museos dedicaos a él.

Cuando una persona manifesta públicamente cousas del amore convién sere prudente. Porque naide yía imparcial, porque tolas opiniones nun puen tener outra xustificación que la esperiencia propia. El que diz dalgo del amor, siempres nos cuenta dalgo de sí mesmu.