Sade ya los sádicos

¿Había sádicos antias de Sade?. Nos días cabeiros del mes de San Xuan de 1772 hubo na ciudá de Marsella un escándalu mui sonáu que chegóu a toda Francia. El Marqués de Sade ya’l sou criáu fueran los protagonistas d’aquel escándalu. Chegaran entrambos a Marsella en ficias de recochere dineiru pa los gastos que tenía’l Marqués pola sua afición al teatru, pero’l día 28, recién estrenáu’l branu, axuntánonse entrambos con cuatro mozas que gobernaba una madama ya la fiesta terminóu nuna orxía de la resultanon enfermas aquel.las mozas. L’autoridá sospechóu que’l responsable de la enfermedá d’aquel.las mucheres yera’l Marqués de Sade, al que yá perseguía la sua fama d’envenenar a la xente pa probar los efeutos de los afrodisíacos. L’acusación dicía que’l marqués drogara a las mozas cona cantárida (‘lytta vesicatoria’), chamada tamién ‘mosca española’. Outras versiones dicen que lo que fixeran Sade ya’l sou criau fuera invitar a un bail.le a muita xente ya meter la cantárida nunos bombones de chocolate que provocanon un frenesí coleutivu. Yá anos antias, n’Arcueil, acusaran al personaxe d’escándalos asemechaos, de manera que, anque paez que nun pudo demostrase nada, el marqués tuvo qu’afuxir de Marsella ya de la xusticia.

Casárase Sade nun matrimoniu de conveniencia: conocíu a la sua prósima mucher, Renée de Montreuil, namás dous días antias de la boda nuna ilesia de París. El Marqués de Sade pasóu la sua vida de cárcel en cárcel. Tuvo presu con tolos rexímenes políticos de la época turbulenta na que vivíu ya terminóu nun manicomiu, onde lu diagnosticanon como “demente l.libertinu”. Yera un gran l.lector ya autor de muitas obras, nas que puei vese un pensamientu egoísta pal que tou puei xustificacase, tamién mancar a outras personas, con tal d’atopar el placer propiu. Convirtíuse en l.leenda, de manera que del sou nome propiu formánonse los apelativos ‘sadismu’, ‘sádicu’ ya ‘sádica’ pa referise a la tortura por placer. Anque la filosofía de Sade tenía un aquel más bien sexual, el sadismu considérase presente nos outros comportamientos de la vida.

Sade naciera en París en 1740 ya terminóu la sua vida en 1818. Pero ¿había sadismu antias de Sade? Esta yía una cuestión interesante. El molín del tiempu va reclasificando las cousas con nuevos conceutos. Yía evidente que conocemos personaxes hestóricos que fuenon sádicos. Conocemos a xente analfabeta que yía sádica dafeitu, pero nin siquera sabe lo que significa ‘sadismu’. Esta palabra nun apaez nos diccionarios hasta 1834: el mesmu Sade nun sabía que yera un sádicu. Torturar pa saber, un sádicu del Sieglu de las L.luces.