Los l.lobos de Nueitebuena

Pasóu cuantayá, una tarde de Nueitebuena. Pol val.le había manchas de nieve de la nevadona que cayera, pero agora esnievaba. De repente, unos l.lobos apaecienon corriendo pol monte, cerca de las casas. En poucos segundos enteróuse tola xente ya salimos pa vere los intrusos.

Diban corriendo, pero paecían cansaos. Aquel.la yera una escena poderosa. Los l.lobos corrían cerca de las casas ya despertaban na xente un pánicu que dende siempres dormía nel inconsciente coleutivu. ¡Los l.lobos, los l.lobos! «¡Malos l.lobos te coman!», dicía la maldición. En realidá nun había l.lerza de verdá: el corazón sentía pánicu, pero non la razón, porque tola xente sabía que nun había peligru, que nun amenazaban a las personas nin a los animales de casa. Yeran como un anacronismu inofensivu, pero lo que pasaba yera que los l.lobos chegaban cona carga d’emociones viechas, sentimientos petrificaos nos cuentos que se contaban pola nueite ya nas l.leendas dichas en voz baxa.

Pola sua parte, los l.lobos tamién sabían que yá nun yeran peligrosos pa la xente de las casas. Baxanon, probablemente, emburriaos pola fame ya la desesperación ya simplemente afuxían, afuxían pa onde fuera, namás afuxían. Yeran unos animales derrotaos, que sabían que yeran perdedores. Tolos males puen olvidase, menos la rendición. El dolor de la derrota la guarda l’alma hasta la muerte, porque nun hai consuelu que seya quien a faer desapaecer el pasáu de la humillación. Tovía los l.lobos podían matar dalguna ougüecha no monte, pero sabían que perdieran la épica de la sua ferocidá. Una cousa los humillaba más entovía: vivían gracias a la protección de l’autoridá, esa que, anos antias, pagaba a los qu’enseñaban los l.lobos muertos ya agora los encarcelaba. Los l.lobos corrían pol monte cerca de las casas, pero la suas cacechas diban mancadas pola vergüenza. Dalgún cazador salíu cona escopeta, pero yá yera tarde, porque los l.lobos encubrienon darréu detrás de la montaña. Sonóu un disparu, pero aquel estrueldu fuera namás un ritual.

La nueite chegóu ya tamién las celebraciones. Yera una Navidá probe, en comparanza conas d’agora, pero nun faltaba’l buen humor ya tampoucu los turrones. Faer una mínima cesta de Navidá conas alambres qu’envolvían el corchu de las botellas del «champán El Gaitero» yera una de las diversiones de la xente pequena. Esta xente pequena fíxose grande ya agora las cousas son diferentes. Cheganon outros aires, seguramente del desiertu, que desanicianon el buen humor. Ya’l verde val.le quedóu ermu. Agora podemos compartir la tristura de los l.lobos perdedores, agora sabemos cómo se sentían.