La estrel.la
Güei espertéi con un suenu, un suenu que yá tuviera, un suenu que yá escribiera. Un suenu que m’enseñaba qué yía la felicidá, que yía una cousa bien distinta del placer ya de l’al.legría.
—Vete, vuela como una centel.la, pasa los ríos ya los tesos, porque, si non, la tua ficha morrerá.
Ya you corría polos sendeiros. Pa ganar tiempu atachéi por una val.lina, pero, ¡ai!, metí’l pía nuna trampa qu’había umbaxo la nieve ya un dolor muitu fondu partíume l’alma. Tenía rotu’l todiel.lu ya sangraba ya nun yera quien a sacar la pierna.
Primeiro, enfadéime. Más tarde, asustéime ya pidí ayuda a los dioses. Finalmente choréi, porque yá nun podía dir cona sustancia sanadora pa la querida ficha, que terminaría morriendo. Poucu a poucu fuenon marchándome las fuercias ya los güechos anublábanse. Escurecía. La l.luz menguaba mientras l’aire ruxía al l.lau de los carbachos. Anque perdiera la esperanza, pidí ayuda outra vuelta a los dioses ya una estrel.la mui bril.lante púxose a crecere no mediu del cielu, partiéndolu en dúas medias l.lunas qu’arrodeaban las montañas. Ya entós pasóu una cousa bien rara: paróu’l dolor no mieu todiel.lu ya fui quien a sacare’l pía de la trampa qu’escondiera la nieve. La ferida siguía abierta, pero nun dolía nin sangraba. Mientras m’estrañaba por aquel momentu propiu de los suenos, you aproveitéi pa dire a casa corriendo. Ya cada vez corría más ya más. Corría más que los gritos del Renubeiru ya entós salienon los l.lobos, que m’arrodeanon. Abrienon las suas bocas, arregañanon los colmiel.los ya atravesánonme cona mirada. Cuando paecía que querían matame ya comeme, los l.lobos garránonme conos caniles ya l.levánonme pa casa en volandas. Pousánonme onde la nuesa puerta. Entós, you xubí al cuartu de la nena cona sustancia sanadora ya, namás tragar la bébora, la nena salíu de la tristura ya marchanon la fiebre ya’l dolor, tamién el cansanciu.
La xente de casa volvíase l.louca d’al.legría, pero you nun m’alcontraba al.legre, you nun sentía la vibración de l’al.legría, sinón el silenciu ya la lentitú d’una melodía tranquila, igual que cuando quedas amirando pa los faloupos que, nas nueites máxicas de cuando nenu, baxan del firmamentu trayendo mensaxes que tas a puntu de descifrar. Cuando l.levaba la pila de los fisuelos pa celebrar la sanadura, alcontréime con una mucher mui blanca, tan blanca como’l cometa que bril.laba no cielu. Ya la mucher blanca, con una voz guapísima, dixo:
—Tienes suerte. Contaréite una hestoria. Hai una constelación más al.lá de l’al.legría, yía la constelación de la xente feliz. Feliz como tu, que yá conoces la felicidá.