Xeopolítica d’una palabra

L o qu’una l.ligua val, la realidá del sou poder veise cuando tien palabras que nun somos quien a traducire a outru idioma. Esta opacidá ya personalidá de la l.lingua veise nunas cuantas palabras de nuesu. Alcuérdome d’una que muitu s’usaba, anque paez que cuantayá principióu a perdese na memoria de la xente. Refiérome a la palabra «zuna». Yía imposible traducila ya pa esplicala tenemos que faere frases enteras ya poner exemplos. Cuando la outra persona a la qu’esplicamos el significáu l.logra entendelu, el.la mesma dase cuenta de que yía imposible una traducción perfeuta.

Dizse qu’una persona «tien zuna» cuando, por exemplu, nun nos contesta con claridá, sinón que lu fai con más ironía ya ambigüedá de la cuenta, como guardando dalgo pa sí, como reservando la sua postura. Outras veces dizse que dalguién tien zunas cuando nos referimos a que yía una persona con del.las manías o caprichos negativos, porque en muitos casos la zuna yía un viciu, una mal vezu. Sicasí, muitas veces chamamos «zuniegu» o »zuniega» a dalguién ensin querer insultalu, namás como alvertencia de complicidá.

Cuando un nenu crez ya deprende a contestar con doble significáu ya yía quien a siguir la conversación sarcástica de los adultos dicimos que «yá tien zuna». Alcuérdome de dir conas vacas de mia buela pol Val.le de Pedrosu ya de que siempres había dalguna magüeta que tenía la zuna de salise del sendeiru ya había que correre cona guichada pa tornala. Tienen zuna los humanos, los animales ya hasta, en casu estremu, dalguna planta que yía rebelde ya caprichosa. Pa bien sere fairía falta poner más exemplos.

Yía interesante la etimoloxía d’esta palabra. Na nuesa l.lingua hai pouquísimu lésicu que venga del árabe, pero «zuna» sí paez tener esi orixen, porque según dalgún l.lingüista vien del árabe «sunna», que significa ‘l.lei’, ‘norma’. No mundu del islamismu hai dúas canas: una yía la de los chiítas ya outra la de los sunnitas. Anque tous respetan la sunna islámica, son los sunnitas los que tienen un especial aquel cona norma, cona sunna. Esta terminoloxía nun yera conocida hasta va bien poucu, pero nos últimos anos apaez con muita frecuencia nos medios de comunicación la dicotomía sunnitas/chiítas. El motivu yía que’l nuesu mundu vuelve a tar gobernáu polas potencias, la guerra ya la conquista, o seya, pola xeopolítica. Agora toul mundu entiende de xeopolítica ya nos calechos públicos hai análisis xeopolíticos a esgaya. Hasta la xente calcula cuándo chegará’l desaniciu atómicu: son zunas peores qu’aquel.las a las que se refería la nuesa ya humilde palabra ‘zuna’ na vida cotidiana.