La cenisa, la bula ya’l tiempu

S iempres que cambia la sociedá ya la ideoloxía cambia tamién la perceición del tiempu. Antias, igual nos pueblos que na ciudá, la temporalidá marcábanla con muita fuercia las fiestas ya las celebraciones. Cada parte del anu yera diferente: la Navidá abría’l portiel.lu del nuevu anu, San Xuan daba anuncia del branu... Agora’l tiempu ta uniformáu dafeitu: igual comemos turrón pol branu que nos fartamos cualquier día que nos preste faelu. Asina, el pasáu miércoles de cenisa celebróuse cuasi a escondidiel.las, ensin danos cuenta. Ahora esa costume paez rara, porque pertenez a una visión del mundu que marchóu en poucos anos. Aproveitábase la cenisa que quedara de queimare las palmas del Domingu de Ramos del anu anterior ya marcábase la frente de la xente con una cruz de cenisa. El simbolismu yera mui fuerte ya bien fondu: «Alcuérdate: sos polvu ya convertiráste en polvu». En l.latín yera más misteriosu: «Memento...».

Al chegare’l miércoles de cenisa terminaba l’Antroidu, que yera la fiesta onde se celebraba la vida prestosa: había una catársis ya comíase a farta, por eso ‘antroidare’ significaba ‘correr l’Antroidu’, pero tamién ‘comer muitu’. Pal Antroidu reservábase lo mechor del samartinu ya dulces como los fisuelos o feisuelos. Había qu’aproveitare a comere a embute, porque l’alcordanza de que somos cenisa metía a la xente nuna cuarentena de purificación ya d’ayunu. Estudios intelixentes con perspeutiva materialista piensan que los ayunos tenían la lóxica oculta de diversificare l’alimentación humana, de manera que detrás de la creyencia había una busca racional (anque inconsciente) d’atopar un equilibriu na dieta pa la salú. Gracias a aquel ascetismu respeutu a la carne chegaban a las casas el bacaláu ya outros animales del mar.

Los que yéramos monaguillos (daquel.la yéramoslo tolos nenos según crecíamos) víamos que la ilesia se chenaba de bulas, papeles que se mercaban por una peseta ya dexaban que la xente comiera carne ya pudiera sufrir menos l’ayunu. Comprábanse las bulas pa comer más ya la xente l.levábalas pa casa como xustificante de que nun pecaba por comere los alimentos que la Ilesia prohibía naquel.la parte del anu.

Tolas alcordanzas d’aquel fragmentu del tiempu del anu chegan güei a la mia memoria con un aquel escuru, anque daquel.la la xente nun yera menos feliz qu’agora nin había medicamentos pa tornar l’angustia. Nel anu 1966 el Papa prohibíu las bulas ya la xente dexóu de mercare’l papel que dispensaba del ayunu. Van 58 anos: dientro d’outros tantos anos, cousas qu’agora vemos naturales ya lóxicas serán tamién pa la xente una cousa mui rara.