El nómada

Cuando yéramos pequenos el tiempu duraba muitu ya una tarde, por exemplu, paecíanos lo que cuando somos grandes yía cuasi un mes. Un día, depués d’andar xugando no pórticu de la Ilesia, marchemos pa Las Veigas, onde acampaba una xente de fuera, a los que los nenos chamábamos «los húngaros». Cada ciertu tiempu pasaba una caravana d’estos húngaros, que formaban un campamentu nas afueras del pueblu. Yeran tiempos con una moral social diferente dafeitu de la que tenemos anguanu ya dedicábamosnos a lo que güei nun faeríamos: acercábamonos a onde tenían aquel.los carros ya tiendas de campaña pa entamala a morrillazos escontra’l campamentu, hasta que los húngaros salían ya empezaban a insultanos ya a tiranos tamién piedras. ç

Cuando cheguemos al pueblu ya paremos, mui cansos, dicía unu de los nuesos qu’él viera a un húngaru salir con una «honda» ya que moviera en círculos aquel instrumentu pa mandanos una pedrada. Anque namás él viera aquel.la cousa tan exótica, la honda, tous creyimos que yera verdá, seguramente porque daba más aspeutu épicu a l’aventura que tuviéramos contra aquel.la xente. Más tarde penséi que fuera aquel.la hestoria de la «honda» una especie d’alucinación de nenos qu’asociaban aquel.los carromatos ya aquel.la xente tan rara cona hestoria de David ya Goliath: pa la mentalidá infantil yera especialmente suxerente xunir la vida vulgar ya cotidiana del nuesu pueblu con una incursión na hestoria d’Israel, que figuraba na enciclopedia. Esti recursu a la épica yera frecuente cuando volvíamos de los ataques de los campamentos que montaban los húngaros, de manera que nos siguientes asaltos que faíamos a morrillazos contra aquel.las tiendas contábanse cousas estrañas que comentábamos en voz baxa.

Concretamente, una tarde de cuando yá terminaba’l branu, al volver de la pelea a pedradas conos húngaros, contanon dalgunos que vieran a una húngara que yera home ya mucher al mesmu tiempu. Fuera esta la primera vez que you vi a los «nómadas», esos pueblos de los que yá quedan poucos, menos cada día. Los nómadas d’anguanu son más bien tribus marxinales ya con mala calidá de vida. Pero nun fuera asina siempre, porque los pueblos nómadas anteriores a la ganadería ya a l’agricultura sabemos agora que tenían una vida cómoda. En creciendo la población ya faese sendentaria, la humanidá quedóu de quietu nas aldeas. Entós aumentóu la economía, pero tamién la desigualdá ya la esclavitú. Pero esta humanidá fuera nómada la mayor parte del tiempu ya la vida sedentaria yía relativamente reciente. En nós queda muitu de nómadas: siempre dispuestos a buscar la vida l.luenxe.